Korçë/Vijojnë takimet informuese dhe sensibilizuese në shkolla.
Në zbatim të marrëveshjes së bashkëpunimit mes Ministrisë së Brendshme dhe Ministrisë së Arsimit dhe Sportit, për programin “Siguria e të rinjve”, shërbimet e Policisë kanë vijuar takimet sensibilizuese me nxënësit e shkollave 9-vjeçare në fshatrat Podgorie dhe Ravonik.
Takimet u zhvilluan nga ndihmësspecialistët e DVP Korçë, me nxënësit dhe me stafet pedagogjike të këtyre shkollave.
Gjatë takimeve u bashkëbisedua me nxënësit, për çështje që lidhen me trafikimin e qenieve njerëzore, bullizmin dhe format e shfaqes së tij, për mënyrën sesi duhet të mbrojmë veten dhe të tjerë nga shfaqja e bullizmit, për dhunën në shkollë dhe në familje, për hapat që duhet të ndërmarrë secili prej nesh për të raportuar dhunën dhe për sigurinë në internet.
Punonjësit e Policisë kishin përgatitur materiale ilustruese për nxënësit, për të pasur një bashkëbisedim më të thjeshtë dhe më praktik ndërmjet tyre.
