Kori “Lira” u formua në vitet 1917-1922 dhe ka 102 vite që vazhdon të jetë aktiv, duke ruajtur dhe përçuar magjinë e këngëve qytetare të Korçës dhe jo vetëm. Në netët e ftohta të qytetit, ky kor ngrohte zemrat e njerëzve duke kënduar nën dritaret dhe ballkonet, me një kitarë ose mandolinë në dorë. Themeluesit e këtij kori krijuan një trashëgimi të vyer, e cila është ruajtur dhe pasuar brez pas brezi me përkushtim. Sot, kori “Lira” ka nxjerrë në pah artistë me të cilët Korça krenohet, duke i dhuruar qytetit tingujt më të bukur të këngës dhe muzikës.
Një ndër artistët më të njohur të këtij kori është Thanas Kondili, një ikonë e muzikës korçare dhe serenatës. Ai rrëfen për MCN disa nga momentet më të rëndësishme të udhëtimit të Korit “Lira”.
Sipas tij, në të gjithë historinë e muzikës shqiptare, grupi më karakteristik ka qenë Kori “Lira”, ndërsa me humor thekson se korçarët janë bekuar nga natyra me vesh dhe zë të veçantë.
Ndërkohë, Pandi Bello, dirigjent i Korit “Lira”, tregon se kori përbëhet nga 32 anëtarë, ku nga anëtarët e vjetër kanë mbetur vetëm dy: Pandi Tasellari dhe Llazi Balashi. Ai thekson se koncertet e Korit janë të pandërprera gjatë gjithë vitit.
Ai shpjegon se provat zhvillohen dy herë në javë dhe se tradita e këtij kori po ruhet dhe pasurohet me kalimin e kohës.
Kori “Lira” është një pasuri artistike dhe kulturore jo vetëm për korçarët, por për të gjithë vendin, duke mishëruar vlerat qytetare dhe artistike të qytetit ikonik të Korçës.
