KUR HAKMERRET POLITIKA
Portreti i Inxhinierit Pyjor Agolli Mandi “pikturuar” me fjalë trishtimi për një realitet absurd që ndodh në këtë vendin tonë të çudirave të padëgjuara gjëkundi më ndonjë vend tjetër , por këtu në vendin tonë janë “meny” e përditshme që gatuhet nëpër zyrat e partisë-shtet ku vigjëlenca revolucionare e patronazhistëve injorantë është më e mprehur se kurrë .
Kështu ka ndodhur edhe me këtë Inxhinierin Pyjor , me këtë djalë të ri të arsimuar e të kulturuar që do ta kishte nder dhe privilegj çdo institucion qeveritar për ta pasur punonjës në organikën e vet , por jo , këtu në vendin tonë nuk ndiqet praktika e rekrutimit sipas profileve dhe arsimimit , por sipas militantizmit dhe duartrokitjeve për “liderin e madh” , për “idhullin” e militantëve e patronazhistëve të fëlliqur që dinë për të tjerët edhe sa herë shkojnë për t’u shurruar e ku shurrohen !
Inxhinieri Pyjor Mandi Agolli , një djalë i arsimuar Mokrar prej Dunicës së moçme të miteve e të legjendave , sot është i papunë e kjo ndodh falë bindjeve të tij të djathta .
Këtë absurd ma ka thënë vetë Inxhinier Mandi Agolli gjatë një bisede që zhvilluam para do kohësh në Prrenjas ku vërejta me kënaqësi se përpara meje , në tavolinë muhabeti ndodhej një personazh jo dosido , por një i ri i arsimuar , vizionar , parimor dhe objektiv që “fjalën e dytë nuk e thoshte të parën” dhe ajo më kryesorja qëndronte se asnjëherë nuk shfrynte mllefe dhe inate për diskriminimin klasor që i kanë bërë , qoftë familjes dhe fisit të tij “Agolli” gjatë sistemit komunist , por edhe sot ky intesiteti i luftës së klasave ka rënë prap mbi shpatullat e këtij Inxhinieri Pyjor .
- Kam punuar me devotshmëri , me përkushtim , sepse punën e bëja me pasion , sepse ishte dhe është puna për të cilën kam investuar gjatë arsimimit tim në Fakultetin e Inxhinierisë Pyjore në Universitetin e Tiranës dhe kur prisja se do më falnderonin për punën , më thërrasin në zyrë e më komunikojnë largimin prej saj – flet plot zhgënjim Inxhinier Mandi Agolli , por qesharakja , e papranueshmja për mua ishte motivacioni i largimit dhe ky motivacion i pashkruar , por i lëshuar gojas qe “largohesh për bindjet e tua politike , sepse nuk i ke shërbyer kauzës sonë politike !!”
Të gjithë bashkëpuntorët ku pati punuar Mandi Agolli shprehen me fjalët më vlerësuese për njohuritë shkencore që zotëronte ky Inxhinier Pyjor jo vetëm si specialist i mirëfilltë e pasionant , por edhe si njeri i pajisur me vyrtyte njerëzore që e pati bërë personazh të respektuar e të dashur , por ja që , politika , kjo gangrenë kancerogjene nuk e le njeriun e duhur , punëtorin e përgjegjshëm , Inxhinierin e kualifikuar të japë kontributin e vet në fushën ku është arsimuar dhe është pasioni i tij .
Ky shkrim nuk ka si qëllim në vetvete të bëjë portretizimin e këtij djali Mokrar , këtij Inxhinieri Pyjor që vjen nga një familje e fis me kontribute të mëdha për Mokrën e për Shqipërinë , por njëherazi është edhe një këmbanë alarmi që duhen ta dëgjojnë ata që mbushin zyrat me militantë injorantë dhe lënë pa punë njerëzit seriozë , specialistët e kualifikuar dhe të aftë për të bërë studime të mirëfillta shkencore në fushat përkatëse ku kanë investuar dhe janë arsimuar !
Po nejse , këtu nuk ka vlerë vlera , sepse për pushtetarët uzurpues , vlerë ka lëpirësi , servili dhe injoranti .
Ata njerëz pa komplekse partiake që e njohin këtë djalë , Inxhinierin Pyjor Mandi Agolli , pa asnjë pikë dyshimi flasin fjalët e vërteta vlerësuese për të , sepse “fshati që duket s’do kallauz” dhe Mandi Agolli nuk ka nevojë për “t’ia ribërë biografinë” , sepse biografia e tij është e qelibartë , është biografi e mbushur me vlera , me vyrtyte , me kulturë dhe me arsimim të shumanshëm !
Mandi Agolli të uroj çdo mirësi dhe dua ta mbyll me disa vargje që më së shumti të shkojnë për shtat ty , sepse jeni një vlerë e intelegjencës Mokrare … “Arin s’e ndryshk balta…/ Malin s’e fsheh reja…/ Po majat e larta…/ I godet rrufeja…/”
