Burimi: Korca Boom
Ndërkohë që përgatitjeve verore po u vjen fundi pasi starti i kampionatit është në prag, trajneri Ivan Gvozdenoviç dhe stafi i tij akoma nuk mund të themi se kanë një formacion stabël të paktën qysh në start në ndeshjen e parë ndaj Elbasanit dhe më pas në përballjet e tjera.
Por nga ajo që është parë edhe në ndeshjet e fundit miqësore kryepankina e Skënderbeut në disa ndeshje ka reshtuar thuajse të njëjtin 11-shës. Pavarësisht blerjeve të shumta është e vështirë deri në këto momente, për të thënë se ky apo ai lojtar do të jetë titullar te Skënderbeu.
I vetmi i ardhur në merkaton verore që duket se po përshtatet dhe ka shënuar dy gola deri tani me fanelën e Skënderbeut është sulmuesi 23-vjeçar nga Gana Bismark.
Edhe Henrik Nerguti mesfushori 21-vjeçar që mbërriti së fundi dhe vjen nga kampionati slloven, akoma nuk mund të themi një fjalë të fundit nëse do të fillojë titullar apo jo, pasi do kohë që të përshtatet.
Në këtë mënyrë në bazë të aktivizimeve të deritanishme, Skënderbeu formacionin ideal e ka thuajse me lojtarë që ka pasur sezonin e kaluar, me të vetmin ndryshim në majë, ku në vend të Franklin do të shohim Bismark.
Më poshtë sjellim edhe formacionin e momentit që ka praktikuar edhe Gvozdenoviç deri në këto momente
Në portë: Marko Alia
Në mbrojtje: Kosta Vangjeli në të djathtë. Elvis Prençi dhe Marko Ramos në qendër. Andrea Gerco në krahun e majtë.
Në mesfushë: Mario Rabiu përpara mbrojtjes në rolin e shkatërruesit. Juri Merlim dhe Dejvid Janaqi në mesfushë.
Në sulm: Ermir Rashica dhe Ardit Nikaj dyshja e krahëve. Bismark në qendër të sulmit.
