Pogradec, 7 Korrik 2024 – Gjatë dy ditëve të fundit, Qendra Multifunksionale Pogradec (QMP) pranë Bashkisë Pogradec dhe shoqata e tenisit “Tenis Tirana” organizuan turneun e tenisit në plazh, “Selita Open Pogradec Beach Tenis 2024”. Ky bashkëpunim i jashtëzakonshëm mblodhi rreth 60 pjesëmarrës nga e gjithë Shqipëria, të cilët garuan mes tyre në një atmosferë sportive dhe festive.
Në përfundim të kampionatit, organizatorët dhe pjesëmarrësit shprehën mirënjohjen dhe falënderimet e tyre për organizimin e shkëlqyer të këtij eventi. U dakordësua gjithashtu që “Selita Open Pogradec Beach Tenis” do të bëhet një aktivitet i përvitshëm në kalendarin sportiv të aktiviteteve që organizohen në Pogradec nga QMP pranë Bashkisë Pogradec.
Ky turne i dha një shtysë të re promovimit të sportit të tenisit në plazh në Shqipëri dhe u shërbeu pjesëmarrësve si një mundësi për të treguar aftësitë e tyre dhe për të shijuar një garë të ndershme dhe emocionuese.
