Nga: KF Kalaja
Ditën e shtunë skuadra U-19 luante ndoshta ndeshjen më të rëndësishme të sezonit, një nga ndeshjet “play off” për tu ngjitur në superligë kundër bashkëmoshtarëve të skuadrës A.F Shkodra.
Udhëtimi drejt qytetit të largët të Shkodrës nisi po atë ditë në orën 6:00 të mëngjesit, udhëtim i cili zgjati gati 6 orë ku vetëm për ndeshje futbolli nuk mund të diskutohej në kushte të tilla dhe rezultati e tregoi më së miri këtë, çunat humbën 3-0! Normal që do humbisnin pasi i dridheshin këmbët nga udhëtimi i gjatë.
Pakënaqësisë nga ana e lojtarëve drejtuesit iu përgjigjën me presion për përjashtim. Si ka mundësi që ekipi U-19 të trajtohet kaq keq dhe pa dinjitet ku këta të rinj presupozohet të jenë të dytët për nga rëndësia pas ekipit të parë..!?
Në fillim të sezonit drejtuesit u shprehën se akademia do ketë një trajtim të veçantë, madje kemi mësuar se drejtuesit prej disa kohësh kanë filluar të bëjnë mbledhje herë pas here me trajnerët e akademisë.
A adresohet dhe a vihet në diskutim ky problem i udhëtimeve ç’njerëzore që i bëhet adoleshentëve..?! Trajtimi i veçantë që u theksua në fillim mbeti vetëm në letër, asgjë s’ka ndryshuar për mirë!
Akademia funksionon me vetëfinancim pasi prindërit e lojtarëve paguajnë nga 4000 lekë të reja ose 40 mijë lekë të vjetra në muaj. A ka dijeni Bashkia Pogradec, bordi drejtues apo personi përgjegjës për akademinë për këto kushte..?! Përmendim Bashkinë Pogradec pasi ky institucion akordon 300 milion lekë të vjetra në vit për skuadrën e parë.
Nga këto para a akordohet diçka për akademinë..?!
Çfarë mendojnë ekspertët e sportit për këtë situatë, nuk duhet të flasim për asgjë meqë K.F. Pogradeci doli në kategorinë e parë..?!
