Peizazhi nëpërmjet fotografisë së Kristaq Sotir
Foto, Liqeni i Pogradecit në fokusin e fotografit Kristaq Sotir.
Kristaq Sotir ishte një ndër fotografët më të njohur në Shqipërinë e gjysmës së parë të shek XX. Ai është cilësuar nga kritikë vendas dhe të huaj si mjeshtër i portretit dhe i artit të të vëzhguarit.
Krijimtaria e tij merr vlera të vecanta për anën sociale, ekonomike, kulturore, fetare të kohës të përfaqësuara nga një seri tematikash të larmishme ku një ndër to është edhe peizazhi.
Specialistët e fotografisë e kanë cilësuar Sotirin “poet të natyrës” pasi ai ishte kërkues dhe interpretues i pasionit për natyrën. Në shkrepjen e peizazheve ai ishte romantik, trajtonte bukuritë e botës natyrore, ndërveprimin e natyrës në një shkallë më të drejtpërdrejtë me qënien njerëzore, të cilat vërehen dhe tek fotot e liqenit.
Padyshim që fotografia Sotirit mbetet një pasuri kombëtare në këtë fushë, vlerë dokumentuese dhe artistike. Nga Sotiri sot trashëgohen rreth 15.000 negative dhe rreth 1.700 fotografi që përbëjnë bazën e gjithë punës së mjeshtrit.
