Në një atmosferë festive dhe të ngrohtë, u kremtuan 24 vjet nga Dita e Shpalljes së “Parkut Kombëtar Prespë”. Kjo ditëlindje u festua me një sërë aktivitetesh festive, duke përfshirë një ekspozitë me piktura të titulluar “Prespa Ime”, të realizuara nga fëmijët e zonës.
Gjatë festës, u zhvilluan këngë dhe valle tradicionale të zonës, ndërsa pjesëmarrësit patën mundësinë të vizitonin kishat dhe muzeun. Për të pasur një eksperiencë të plotë, një grup i pranishëm bëri një vizitë emocionuese në ishullin e Maligradit, ndërkohë që të pranishmit shijuan një degustim të ushqimeve tradicionale.
Në këtë festë ishin të pranishëm personalitete dhe përfaqësues të rëndësishëm, duke përfshirë Drejtoreshën e Agjencisë Kombëtare të Zonave të Mbrojtura (AKZM) znj. Daniel Pirushi, Drejtoreshën e Zyrës së Agjencisë Italiane të Bashkëpunimit për Zhvillim (AICS) në Ballkanin Perëndimor Tiranë znj. Stefania Vizzaccaro, Kryetarin e Bashkisë Pustec z. Pali Kolefski, Kryetarin e Qarkut Korçë z. Erjon Nexhipi, si dhe përfaqësues të organizatave joqeveritare që japin një kontribut të çmuar në zhvillimin e Parkut Kombëtar të Prespës.
Një falënderim i veçantë u shpreh për Prespa Ohrid Nature Trust – PONT, për kontributin e tyre të vazhdueshëm dhe bashkëpunimin e ngushtë me Parkun Kombëtar të Prespës. Ky aktivitet shënon një vit të suksesshëm të kujdesit dhe promovimit të pasurisë natyrore dhe kulturore të këtij parku kombëtar.
