“Luadhi i Çelos”, është një zonë malore mbi liqenin e Pogradecit, që po tërheq vëmendjen e turistëve të huaj dhe ku ka lulëzuar dhe agroturizmi.
Nisemi nga qendra e fshatit turistik të Tushemishtit dhe në këtë udhëtim na shoqëron specialisti i Zonave të Mbrojtura Gani Bego, i cili tregon karakteristikat e Shtegut të Luadhit. Pas më shumë se dy orësh ecje në këmbë mbërrijmë në pikën më të bukur të Pogradecit, në “Malin e Qytetit”.
Ferat Xhelo është fermeri që mban këtu 500 kokë bagëti dhe 100 koshere me bletë.
“Fermer këtu shikon Shën Naumin, Tushemishtin, Zargocanin. A vijnë turistë? Vijnë turistë në këmbë me ecje, 20-30 turistë dhe shkojnë deri në Peshkëpi. Të huaj janë më shumë që frekuentojnë këtë zonë. Unë kam 30 vjet që punoj këtu në bletari dhe blegtori. Është kullota më e bukur”, tha ai.
Na duhen të përshkojmë dhe 5 kilometra të tjerë për të mbërritur në destinacion: Livadhin e Ccelos që vendasin i thonë “Luadh”. Një sipërfaqe prej 260 hektarësh, ku janë kultivuar pemë frutore, janë ngritur ferma së fundi bujtina. Një mundësi e mirë për zhvillimin e turizmit malor në Pogradec.
