Nga Lorena Kodra:
4 persona rrezikuan jetën mëngjesin e kësaj të marte në ujrat e lumit Prodan. Falë ndërhyrjes së shpejtë nga punonjësit e zjarrëfikses u bë i mundur shpëtimi i tyre, por mungesa e një ure është një problem i mbartuar dhe i rrezikshëm për banorët e dy fshatrave, Gjonç e Prodan në bashkinë e Kolonjës
Shtrati i lumit mbushet me ujë sa herë ka rreshje të dendura, pasi mbledh rrëkejtë që zbresin nga mali i Gramozit, duke sjellë gurë të mëdhenj të cilët e mbushin shtratin dhe bëhen pengesë për rrjedhjen e lirshme të lumit.
Të rrezikuar ndihen jo vetëm banorët e fshatit Prodan që shtëpitë e tyre i kanë buzë lumit por edhe fshati që është sipër tij.
Banorët thonë se e kanë të përditshme kalimin e lumit nga një anë në anën tjetër kjo për vetë faktin se i lidh puna dhe kullotat por ky kalim bëhet edhe më i rrezikshëm gjatë periudhës së vjeshtës dhe dimrit kur situata me lumin përkeqësohet.
Prej vitesh në mes këtij lumi ka mbetur vetëm skeleti i një ure të varur e cila është jashtë funksionit për shkak të amortizimit të plotë të saj. E vetmja rrugë kalimi për banorët e zonës është ecja nëpërmjet lumit gjë që i rrezikon së tepërmi. Të pashpresë, e vetmja thirrje e perseritur e banorëve është ajo për ndërtimin e një ure.
