792 milionë lekë të vjetra është vlera e tenderit që sapo ka njoftuar Bashkia e Pogradecit, këtë të hënë, me objekt “sistemimin e lumit të Buçimasit dhe rehabilitimin e rrugëve përgjatë tij”. Të gjithë subjektet e interesuara kanë kohë të dorëzojnë DST e tenderit deri më 12 shtator.
Grupi që ka hartuar projektin, thotë se Pogradeci dhe gjithë territori në juridiksionin e kësaj bashkie rrezikohet shpesh nga përmbytjet e lumenjve, shkruan newsbomb.al.
Ndaj, referuar dokumenteve një lumë problematik është dhe ai i Buçimasit. Specialistët janë shprehur se lumi i Buçimasit ka shkaktuar shpesh probleme duke përmbytur tokat bujqësorëve të banorëve dhe shtëpitë e tyre.
Fshatrat Buçimas, Gështenjas, Rrëmënj, Vërdovë dhe Guras janë më të rrezikuarit në Njësinë Administrative të Buçimasit. Mirëpo, pavarësisht deklarimeve në raportin për shpalljen e tenderit, nuk rezulton që lumi në fjalë të ketë shkaktuar probleme.
Nga një publikim i Bashkisë së Pogradecit gati dy vite më parë, reklamohet me sukses shmangia e përmbytjeve në territorin e kësaj bashkie, nga ndërhyrjet në kohë të drejtuesve. Edhe nga kërkimet në internet dhe në faqen e Bashkisë, nuk del që lumi i Buçimasit të ketë patur ndonjë vërshim që të kemë marrë para të mbjella dhe shtëpi, shkruan newsbomb.al.
Përsa i përket gjendjes aktuale, grupi i specialistëve që ka hartuar projektin thotë se rruga fillon në kryqëzimin e rrugës së Buçimasit dhe rrugës së Gurrasit, dhe përfundon në kryqëzimin me rrugën e Tushemishtit. Segmenti përshkruhet si në gjendje jo të mirë, rrugë dheu dhe me dëmtime e gropa përgjatë gjithë trasesë.
Gjithashtu, dokumentet e kësaj procedure prokurimi kërkojnë nga subjektet e interesuara që të marrin parasysh hapjen e kanaleve të reja dhe pastrimin e kanaleve ekzistuese, ndriçimin e gjatësisë së rrugës, ndërtimin e veprave të artit (ura), puseta, etj.
Referuar dokumenteve, kohëzgjatja e punimeve parashikohet të jetë 8 muaj, që nga marrja në dorëzim e sheshit të punimeve, nga kompania/subjekti që do të shpallet fitues më datë 12 shtator.
// Newsbomb.al
