Nga zgjedhjet e fundit për strukturat drejtuese në Universitetin “Fan S. Noli” Korçë, fitues me shumicë votash si rektor i këtij universiteti është shpallur Prof. Dr. Lorenc Ekonomi, përballë dy kolegëve të tij, Irena Nikaj dhe Robert Damo.
Ditën e sotme, në një komunikim për mediat, ai ka falënderuar kolegët dhe konkurentët për garën, teksa ka shtuar se universiteti ka shumë sfida të cilat mund të kalohen vetëm duke qenë bashkë.
Në objektivat e tij si rektor, Ekonomi ka vendosur shtimin e degëve dhe programeve të studimit të cilat janë më pranë tregut të punës dhe inovacionit. Gjithashtu, ai shtoi se do të ketë edhe bashkëpunime të reja.
Lorenc Ekonomi pritet të drejtojë për 4 vitet e ardhshme Universitetin “Fan S. Noli” Korçë mes sfidave të uljes së numrit të studentëve dhe sfidën për ndërkombëtarizimin dhe profilizimin e këtij universiteti.
