Korçë – Një zjarr ka rënë në një apartament pranë pastiçeri “Tasho” në qytetin e Korçës. Sipas të dhënave paraprake, flakët kanë përfshirë një nga katet e pallatit, ndërsa tymi është përhapur në të gjithë godinën.
Në vendngjarje kanë mbërritur shërbimet zjarrfikëse dhe forcat e Policisë, të cilat kanë bërë evakuimin e banorëve të pallatit.
Paraprakisht dyshohet se zjarri mund të ketë rënë si pasojë e pakujdesisë, megjithatë shkaku i saktë mbetet ende i pakonfirmuar.
Si pasojë e zjarrit ka humbur jetën një 74-vjeçar, i cili ndodhej në banesë në momentin e rënies së flakëve.
Zjarrfikësit vijojnë punën për shuarjen e plotë të zjarrit, ndërsa grupi hetimor do të kryejë veprimet procedurale për zbardhjen e plotë të shkaqeve dhe rrethanave të ngjarjes.
