Detaje të reja nga vrasja e 78-vjeçarit në Bulgarec.
Mësohet se trupi i pajetë i Gëzim Vijës u gjet mëngjesin e së enjtes nga punonjësi i postës, i cili shpërndan pensionet. Ai e ka thirrur 78-vjeçarin për të dalë dhe, kur nuk ka marrë përgjigje, ka njoftuar fqinjët. Më pas, ata kanë hapur derën e banesës, ku në një prej dhomave është gjetur trupi i pajetë i të moshuarit.
Ekspertiza mjeko-ligjore ka konstatuar se 78-vjeçari kishte një plagë të thellë në kokë, e shkaktuar me mjet të fortë, e cila i ka sjellë vdekjen. Dyshohet se autori dhe viktima janë përleshur para se 78-vjeçari të goditej për vdekje.
Policia dhe ekspertët janë rikthyer sot në vendin e ngjarjes, ndërsa ende nuk është gjetur mjeti me të cilin dyshohet se është kryer vrasja.
Vijon marrja në pyetje e familjarëve dhe të afërmve të viktimës, por deri tani deklarimet e tyre nuk kanë dhënë informacione të vlefshme që do të orientonin hetimet drejt identifikimit të autorit.
