Korçë – Ndalime dhe procedime penale për falsifikim, aktivitet të paligjshëm financiar dhe shpërndarje të materialeve të ndjeshme në rrjete sociale
Specialistët e Sektorit për Hetimin e Krimeve Ekonomike dhe Financiare në Drejtorinë Vendore të Policisë Korçë kanë finalizuar disa veprime hetimore, duke çuar në ndalimin e një shtetasi të dënuar nga gjykata, si dhe në nisjen e procedimeve penale ndaj dy personave të tjerë, për vepra të ndryshme penale.
Në kuadër të këtij operacioni, u bë ndalimi i shtetasit G. V., 41 vjeç, banues në fshatin Porodinë, pasi ndaj tij kishte një vendim të formës së prerë nga Gjykata e Rrethit Gjyqësor Korçë, e cila e kishte dënuar me 6 muaj burgim për veprën penale “Falsifikimi i vulave, i stampave ose i formularëve”, parashikuar nga neni përkatës i Kodit Penal.
Gjithashtu, u referuan materialet në Prokurorinë pranë Gjykatës së Shkallës së Parë të Juridiksionit të Përgjithshëm Korçë, ku u regjistruan procedime penale ndaj dy personave të tjerë:
- J. N., 58 vjeç, banues në Bilisht, i cili u kap në flagrancë duke ushtruar aktivitetin e këmbimit valuator, pa e regjistruar atë në organet tatimore dhe pa pasur lejen përkatëse ligjore.
- Një 14-vjeçar, ndaj të cilit nisi procedimi penal pasi dyshohet se ka shpërndarë në rrjete sociale foto dhe video të një 15-vjeçareje, pa miratimin e saj, duke cenuar të drejtën e privatësisë dhe dinjitetin e të miturës.
Policia bën me dije se hetimet vazhdojnë për dokumentimin e plotë të rasteve, ndërsa thekson angazhimin për goditjen e çdo veprimtarie të kundërligjshme që dëmton integritetin financiar dhe moral të qytetarëve.
