Polica e sigurimit kufitar me Maqedoninë e Veriut, prej datës 1 Prill, ka çmimin e ri. 50 euro për 1 vit do të paguajnë të gjithë drejtuesit e mjeteve që duan të udhëtojnë në drejtim të shtetit fqinj. Më herët, ata paguanin një tarifë vjetore prej 340 eurosh, por me dallimin që kartoni jeshil ishte i vlefshëm për në gjithë Evropën, përfshirë edhe Maqedoninë e Veriut, ndërsa polica e sigurimit, tashmë e miratuar kundrejt vlerës 50 euro, është e vlefshme vetëm për Maqedoninë.
Përfituesit më të shumtë të vlerës së re janë kryesisht banorët e bashkive Korçë, Pogradec, Prrenjas dhe Librazhd, të cilët janë frekuentues të shpeshtë të Ohrit dhe Strugës, për qëllime tregtare dhe turistike.
Kalimtarët shprehen të kënaqur me tarifën e re të kartonit jeshil dhe theksojnë se tani mund të kalojnë më shpesh me mjetet e tyre në drejtim të Maqedonisë së Veriut.
Më herët, policat kufitare me çmime të ulëta realizoheshin vetëm me Malin e Zi dhe Kosovën, ndërsa prej 1 Prillit është shtuar edhe Maqedonia e Veriut.
