Në bibliotekën “Skënder Luarasi” në Ersekë u zhvillua një aktivitet artistik me rastin e tetorit – muajit të letërsisë, ku nxënësit sollën në skenë pjesë nga vepra e shkrimtarit të njohur Naum Prifti.
Në qendër të aktivitetit ishte komedia “Dasma pa Nuse”, e cila u interpretua me shumë humor dhe energji nga nxënësit pjesëmarrës. Nxënësja Sara Minaj realizoi një monolog të veçantë, ku në fillim të shfaqjes u shfaq e veshur si nuse dhe foli në rolin e saj, ndërsa në fund mori rolin e dhëndrit, duke sjellë një kontrast argëtues dhe plot kuptim.
Shfaqja, e zhvilluar në nder të shkrimtarit Naum Prifti, me origjinë nga Rehova, zgjati rreth 45 minuta dhe u ndoq me interes nga nxënësit dhe stafi pedagogjik. Të pranishmit u argëtuan, qeshën dhe mësuan më shumë mbi krijimtarinë e autorit, ndërsa në fund u zhvillua edhe një bashkëbisedim i ngrohtë me publikun.
Ky aktivitet solli jo vetëm humorin dhe energjinë e të rinjve, por edhe dashurinë për letërsinë shqiptare.
