Orges Ibi, një 17-vjeçar nga Korça, është shpallur fitues i medaljes së artë në Olimpiadën Botërore të Shkencave, duke u dalluar mes 160 të rinjve nga vende të ndryshme të botës, përfshirë Kinën, Amerikën dhe Rusinë.
Olimpiada ishte e ndarë në dy kategori kryesore, bazuar në grupmosha të ndryshme: Kodimi dhe Matematika e Kimia. Orgesi mori pjesë në kategorinë e Kodimit, ku arriti të tregojë aftësitë e tij të jashtëzakonshme.
Në një intervistë, Orgesi shprehet se rrugëtimin e tij në fushën e teknologjisë së informacionit e ka nisur që në moshë të hershme. Me kalimin e viteve, ai ka ndjekur kurse të ndryshme dhe ka kryer praktikë, duke arritur të zhvillojë aftësi të larta në këtë fushë. Përsa i përket fitores, ai tregon se nuk e kishte pritur, ndërsa familja dhe miqtë e tij janë ndjerë shumë krenarë për të.
Kjo fitore duket të jetë vetëm hapi i parë për Orgesin, i cili aktualisht po pret raundin e tretë në një konkurs tjetër. Ai inkurajon moshatarët e tij që të sfidojnë veten në konkurse të tilla, pasi janë përvoja unike që ofrojnë mundësi të mëdha për zhvillim personal dhe profesional.
Suksesi i Orgesit është një shembull i shkëlqyer i talentit të lindur nga pasioni dhe angazhimi i tij, si dhe mundësitë që ofron Qendra e Inovacionit e Bashkisë Korçë. Kjo dëshmon se kur investohet në zhvillimin e rinisë, arrihen suksese që ndikojnë pozitivisht në shoqëri dhe të ardhmen e saj.
Për të mësuar më shumë rreth arritjeve të Orgesit, mund të ndiqni intervistën e tij në videon e mëposhtme.
