Në fshatin Bulgarec, një 78-vjeçar është gjetur i pajetë brenda banesës së tij. Fillimisht, ka qenë familjarë ose banorë të zonës që kanë konstatuar mungesën e tij dhe më pas është zbuluar trupi i pajetë.
Menjëherë pas njoftimit, në vendngjarje kanë mbërritur shërbimet e Policisë, të cilat kanë nisur veprimet e para hetimore për të zbardhur rrethanat e ngjarjes.
Sipas të dhënave paraprake, viktima, i identifikuar si Gëzim Vija, paraqet një dëmtim në kokë. Dyshohet se ky dëmtim mund të jetë shkaktuar nga goditja me send të fortë, çka ka ngritur dyshime për një ngjarje me natyrë kriminale.
Megjithatë, nga komunikimi zyrtar me Policinë bëhet me dije se nuk përjashtohet as pista e një ngjarjeje aksidentale, ku i moshuari mund të jetë rrëzuar dhe për pasojë të ketë pësuar dëmtimin fatal.
Aktualisht, grupi hetimor po punon në dy pista kryesore: atë të vrasjes dhe atë të vdekjes aksidentale. Ndërkohë, vijon këqyrja paraprake në vendngjarje, ndërsa një ekspertizë më e detajuar pritet të kryhet në morgun e spitalit të Korçës, e cila do të ndihmojë në përcaktimin e saktë të shkakut të vdekjes.
